ଖୋଲିଲା ମା' ମଝିଘରିଆଣୀ ମନ୍ଦିର ହୁଣ୍ଡି : ୧ କୋଟି ଟଙ୍କାରୁ ଅଧିକ ଦାନ ରାଶି

ଭୁବନେଶ୍ୱର : ରାୟଗଡା ଜିଲ୍ଲାର ପ୍ରସିଦ୍ଧ ଦେବୀ ମା’ ମଝିଘରିଆଣୀଙ୍କ ମନ୍ଦିରର ୯ଟି ହୁଣ୍ଡି ଦୀର୍ଘ ୬ ମାସ ପରେ ସୋମବାର ଖୋଲାଯାଇ ଗଣତି କରାଯାଇଛି। ଏଥିରୁ ମୋଟ ୧,୦୪,୩୬,୯୬୩ ଟଙ୍କା ନଗଦ, ୩୮ ଗ୍ରାମ ସୁନା, ୨୫୦୫ ଗ୍ରାମ ରୁପା ଓ ୧୨ଟି ବିଦେଶୀ ନୋଟ୍ ମିଳିଛି।

ଗଣତି କାର୍ଯ୍ୟ ସକାଳ ୯ ଟାରୁ ଆରମ୍ଭ ହୋଇ ଦୀର୍ଘ ୮ ଘଣ୍ଟା ଚାଲିଥିଲା। ଏହି କାର୍ଯ୍ୟ ମାଜିଷ୍ଟ୍ରେଟ, ପୋଲିସ, ମନ୍ଦିର କମିଟି, ବ୍ୟାଙ୍କ କର୍ମଚାରୀ ଓ ସ୍ବେଚ୍ଛାସେବୀଙ୍କ ଉପସ୍ଥିତିରେ ହୋଇଥିଲା।

ସୂଚନା ଅନୁସାରେ, ଏହି ଧନରାଶି ଓଡ଼ିଶା ଗ୍ରାମୀଣ ବ୍ୟାଙ୍କରେ ରଖାଯାଇଛି ଓ ସୁନା-ରୁପା କୋଷାଗାରରେ ରଖାଯାଇଛି। ବିଦେଶୀ ନୋଟ ଥିବାରୁ ଅନୁମାନ କରାଯାଉଛି ଯେ, ବିଦେଶରେ ଥିବା ଭକ୍ତମାନେ ମା’ଙ୍କ ଦର୍ଶନ ପରେ ଦାନ କରିଥିବେ।

ଗତ ମେ ମାସରେ ହୁଣ୍ଡି ଖୋଲିବା ସମୟରେ ୯୪ ଲକ୍ଷ ରୁ ଅଧିକ ଦାନ ଆମଦାନି ହୋଇଥିଲା।