କେନ୍ଦ୍ରାପଡ଼ା ଗସ୍ତରେ ମୁଖ୍ୟମନ୍ତ୍ରୀ ମୋହନ ମାଝୀ — ଉନ୍ନତି କାର୍ଯ୍ୟର ସମୀକ୍ଷା, ଇକୋ ଟୁରିଜିମ ଓ ଅବୈଧ କାର୍ଯ୍ୟ ଉପରେ କଡା ଧାରା

ଭୁବନେଶ୍ୱର : ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଆଜି କେନ୍ଦ୍ରାପଡ଼ା ଜିଲ୍ଲା ଗସ୍ତ କରି ବିଭିନ୍ନ ଉନ୍ନତିମୂଳକ କାର୍ଯ୍ୟ ଓ ସରକାରୀ ପ୍ରକଳ୍ପର ସମୀକ୍ଷା କରିଛନ୍ତି । ସେ ଜିଲ୍ଲାରେ ପ୍ରକଳ୍ପଗୁଡ଼ିକର ଅଗ୍ରଗତି ଦେଖି ସନ୍ତୋଷ ପ୍ରକାଶ କରି ବିକାଶ କାର୍ଯ୍ୟ ଓ ଯୋଜନାରେ ଏକାଗ୍ରତା ପ୍ରତି ଜୋର ଦେଇଛନ୍ତି ।

ମୁଖ୍ୟମନ୍ତ୍ରୀ ଘୋଷଣା କରିଛନ୍ତି ଯେ, ହେନ୍ତାଳ ଜଙ୍ଗଲକୁ ଆହୁରି ବିସ୍ତାର କରାଯିବ ଏବଂ ଭିତରକନିକା ଓ ଗହୀରମଥା ଅଂଚଳରେ ଇକୋ ଟୁରିଜିମ ଉନ୍ନତ କରିବା ପାଇଁ ନୂତନ ଉଦ୍ୟମ ଗ୍ରହଣ କରାଯିବ । ଏହା ଜିଲ୍ଲାର ପର୍ଯ୍ୟଟନ କ୍ଷେତ୍ରକୁ ଉତ୍ସାହିତ କରିବ ।

ସୁଭଦ୍ରା ଯୋଜନା ଓ ଲକ୍ଷପତି ଦିଦି ଯୋଜନାରେ ଜିଲ୍ଲା ଦ୍ଵିତୀୟ ସ୍ଥାନ ଅଧିକାର କରିଥିବାରୁ ମୁଖ୍ୟମନ୍ତ୍ରୀ ଜିଲ୍ଲା ପ୍ରଶାସନକୁ ବିଶେଷ ଧନ୍ୟବାଦ ଦେଇଛନ୍ତି।

ଏହି ଅବସରରେ ସେ ବାଂଲାଦେଶୀ ଅନୁପ୍ରବେଶକାରୀଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ନେବା ପାଇଁ ଥାନା ଓ ଜିଲ୍ଲା ପୋଲିସ ପ୍ରଶାସନକୁ ନିର୍ଦ୍ଦେଶ ଦେଇଛନ୍ତି। ଚୋରା ବାଲି ଚାଲାଣ, ଆଇନ ଶୃଙ୍ଖଳା ଓ କର୍ମଚାରୀ ଅଭାବ ସମ୍ପର୍କରେ ତଥ୍ୟ ଗ୍ରହଣ କରି ଶୀଘ୍ର କାର୍ଯ୍ୟାନୁଷ୍ଠାନ ନେବା ଉପରେ ଜୋର ଦେଇଛନ୍ତି।

ସମୀକ୍ଷା ବୈଠକ ପୂର୍ବରୁ ସେ ଏକ ତ୍ରିରଙ୍ଗା ଶୋଭାଯାତ୍ରାରେ ଅଂଶଗ୍ରହଣ କରି ମାଉସୀ ମାଆ ମନ୍ଦିରରୁ ବଳଦେବଜୀଉ ମନ୍ଦିର ପର୍ଯ୍ୟନ୍ତ ପଦଯାତ୍ରା କରିଥିଲେ । ବଳଦେବଜୀଉଙ୍କ ଦର୍ଶନ ପରେ ସେ ଜିଲ୍ଲା କୃଷି ରଥ ଓ ରାଜସ୍ବ ରଥକୁ ପତାକା ଦେଖାଇ ଆନୁଷ୍ଠାନିକ ଭାବରେ ଶୁଭାରମ୍ଭ କରିଥିଲେ ।

ଏହି ଗସ୍ତ ମାଧ୍ୟମରେ ମୁଖ୍ୟମନ୍ତ୍ରୀ ଅଞ୍ଚଳର ବିକାଶ ଏବଂ ସୁଶାସନ ପ୍ରତି ତାଙ୍କ ଏକାଗ୍ରତା ପୁନର୍ବାର ପ୍ରମାଣ କରିଛନ୍ତି।