ଗଜପତି ଜିଲ୍ଲାରେ ପତ୍ନୀ ହତ୍ୟା

ଭୁବନେଶ୍ୱର : ଗଜପତି ସେରଙ୍ଗ ଥାନା ଅନ୍ତର୍ଗତ ଗାଇବା ଗାଁରେ ଏକ ମୃତ୍ୟୁଦଣ୍ଡ ସଦୃଶ ଘଟଣା ଘଟିଛି। ମୋନିକା ପାଇକ ନାମକ ଜଣେ ମହିଳାଙ୍କୁ ଗଳା କାଟି ହତ୍ୟା କରାଯାଇଛି। ଘଟଣା ପରେ ତାଙ୍କ ସ୍ୱାମୀ ନରେନ୍ଦ୍ର ପାଇକ ଫେରାର ହୋଇଯାଇଛନ୍ତି। ମହିଳାଙ୍କ ମୃତଦେହ ଘରଭିତରେ ରକ୍ତରେ ଜୁଡୁବୁଡୁ ଅବସ୍ଥାରେ ପଡ଼ିଥିବା ଅବସ୍ଥାରେ ମିଳିଛି।

ମିଳିଥିବା ସୂଚନା ଅନୁସାରେ, ମୋନିକା ଗାଇବାର ଝିଅ, ଯିଏ ନୂଆଗଡ଼ ବ୍ଲକ ଅନ୍ତର୍ଗତ କେରେଡାଙ୍ଗ ଗାଁର ନରେନ୍ଦ୍ର ସହ ପ୍ରେମ ବିବାହ କରିଥିଲେ । ବିବାହ ପରେ ନରେନ୍ଦ୍ର ତାଙ୍କ ଶଶୁରଘର ଗାଇବାରେ ରହି ଆସୁଥିଲେ । ତେବେ ସେମାନଙ୍କ ମଧ୍ୟରେ ପରକୀୟା ସନ୍ଦେହ ନେଇ ପ୍ରାୟ ଦିନପ୍ରତିଦିନ କଳି ଲାଗୁଥିଲା ।

ସୂତ୍ର ଅନୁସାରେ, ଆଜି ଭୋର୍ ସମୟରେ ଦମ୍ପତି ମଧ୍ୟରେ ବିବାଦ ହେବା ପରେ ନରେନ୍ଦ୍ର ତାଙ୍କ ସ୍ତ୍ରୀଙ୍କ ଗଳା କାଟି ହତ୍ୟା କରି ଘରୁ ପଳାଇଯାଇଛନ୍ତି। ଘଟଣାବେଳେ ଘରରେ ମୋନିକାଙ୍କ ମା ଓ ୫ ବର୍ଷର ଝିଅ ମଧ୍ୟ ଉପସ୍ଥିତ ଥିଲେ।

ଏହି ଭୟାନକ ଘଟଣା ସୂଚନା ପାଇ ଥିବା ସେରଙ୍ଗ ଥାନା ପୁଲିସ୍ ଘଟଣା ସ୍ଥଳକୁ ପହଞ୍ଚି ତଦନ୍ତ ଆରମ୍ଭ କରିଛି। ମୃତଦେହକୁ ପୋଷ୍ଟମର୍ଟେମ ପାଇଁ ପଠାଯାଇଛି। ଏବେ ନରେନ୍ଦ୍ରଙ୍କ ଖୋଜ ଜୋରଦାର ହେଉଛି।